NEN@S DE 3º, TEDES UNHA MENSAXE

Isto é un regalo...como non fun capaz de colgalo no blog do centro e xa levo moitos días, semanas, meses, querendo facer este regalo aos meus nenos, aos que vexo cada día e cada día están máis altos, parade xa que vou quedar moi baixiña!
Isto é un regalo para vós, espero que o desfrutedes como eu desfrutei facéndoo xa que me levou a recordar dos cursos estupendos. Sempre seredes vós, os primeiros.

Un bico

O proxecto vai rodando de marabilla. Os nenos están moi implicados e cada día traen novas, tipos de calendarios, contos, refráns, adiviñas...pronto iremos colgando os materiais no blog para que poidades ir vendo os traballos.

Despois dunha semana de traballo e de coñecernos uns a outros, atopamos un elemento que nos interesa e sobre o cal imos comezar a investigar; resulta que no libro de Matemáticas falamos dos calendarios, e claro, de onde veñen os calendarios? quen os inventou? por que son así?, etc. preguntas que nos fixeron reflexionar: e se investigamos sobre os calendarios?
Pois dito e feito, aquí temos o nome do noso proxecto que comezamos con moita ilusión. Despois de moitas propostas e dunha votación "xusta e democrática" o noso proxecto se chama:

MILLÓNS DE CALENDARIOS

Iremos informando dos nosos avances no tema e das nosas propostas de traballo...

Hoxe estivemos inventando poesías locas, xa veredes que chulas nos quedaron:

AVIÓN BONITO CERRA DIANTE ESTRELAS,
FÓRA GABEAN HELICÓPTEROS IGUALES,
LAVAN MAPAS NOVOS OCULTOS,
PERIGOSOS QUE ROMPEN SARAIBA,
TELLADOS UNIDOS VOAN XUNTOS ZUMBANDO

Bueno, todo na vida ten un fin, tamén un inicio, e mañá será o primeiro día do curso para min despois da miña baixa por maternidade.
Chicos, ídevos preparando para os traballos por proxectos!
Para comezar, imos facer un obradoiro de escrita aproveitando o meu curso do Platega, creo que vai estar moi interesante...
Xa irei introducindo novas a partir de mañá...

Aí vos deixo algunhas das obras que realizaron os nen@s

PROXECTO ANIMALARIO

Na nosa primeira incursión no mundo dos Proxectos partimos dun tema interesante para os nen@s de 2º de Primaria o pasado curso: os animais. Dividimos a clase en catro grupos, os insectos, os mamíferos, as aves e os peixes e cada un dos nenos elixiu un animal do que nos trouxo información de todo tipo.
Tamén elaboramos unha biblioteca de aula con libros de consulta, contos, poesías, etc. referidos aos animais, e por último en Plástica elaboramos un mural cos animais elixidos que os nen@s fixeron coa técnica do collage.
Mirade o resultado e observade que artistazos hai en Cerceda!

Hoxe quería compartir con vós algúns traballos que fixemos o curso pasado na aula. Como vedes, no Entroido aparte de falar das distintas celebracións do mesmo en Galicia, falamos dos Cigarróns e Peliqueiros, e como vedes os nenos fixeron unha máscara ben bonita.

Ola a tod@s!

Ola a tod@s. Chámome Almudena Veira e son mestra de Audición e Linguaxe aínda que actualmente son titora de Primaria.

Empezo este blogue porque quero sumerxirme no mundo dos Proxectos. O pasado curso xa fixemos unha pequena incursión e quero seguir traballando.

Pouco a pouco irei introducindo contidos e o meu diario persoal desta aventura.

Dar as grazas a Bea porque grazas a ela picoume a curiosidade e creo que isto vai saír ben.

Tamén por suposto aos nenos e nenas do CPI O Cruce de Cerceda que estiveron comigo no 1º ciclo os dous cursos anteriores, os meus primeiros "investigadores" nesta aventura que comezamos pronto.